كنا هانروح فى شربة ميه

[القبطان المصرى77]

صباااااااااح الخير على كل من هو يقطن منتدانا
صبااااااااااح العسل على كل قناصين وصيادين مصر
بسبب شوية الملل دول
والجو الحر اللى مزهقنا ده
هاحكيلكو موقف حصل معايا يمكن تضحكو شويه
الحكايه وما فيها اننا انا وصديق كنا اخدنا العربيه بتاعته وخرجنا رحلة صيد قصيره ناحية مدينة النوباريه الجديده على طريق مصر اسكندريه صحراوى وبالتحديد قريه اسمها الناصر وكان هدفنا اليمام وفراخ الميه
وفى اول نص ساعه كانت الحصيله 12 فرد يمام ودجاجه
لغاية كده الامور ماشيه تمام والجو هادى
وبعدين وصلنا عند ترعه كبييييره اوى وعليها خط شجر زى الفل
وفى منطقه زراعيه مقطوعه ومفهاش حتى العفاريت
صاحبى قاللى احنا نركن العربيه هنا على اول الخط وننزل نمشى لغاية اخر الخط نصطاد وبعدين نرجع تانى للعربيه
الفكره حلوه ياض
يلا بينا على التنفيذ
انا سبقته بحوالى 200 متر كده فى نص خط الشجر وهو ورايه من اوله
اول القصيده فى الخط كانت يمامه على مسافة 20 متر تقريبا وطارت ووقعت على الارض بعيد شويه
رحت وراها عشان اجيبها ويادوب مسكتها وسمعت صوت زمجره قريب منى
رفعت راسى لقيت قدامى كلبين شكلهم مرعب وتقريبا مش بيشوفو بنى ادمين خالص

انا بينى وبينكو الخوف مسكنى شويه لكن تماسكت وقلت لنفسى
اثبت ياااااااااض انت
دول كلبين مهما كان يعنى بلاش فضايح
وجبت اليمامه ورجعت وهما ورايا ومش عاوزين يسبونى خالص
عمرت البندقيه وضربت طلقه عشان يخافو لقيتهم هاجو اكتر
واقوله هش مابيهشش
اقوله امشى مابيشمش
وكل ماقول هش بيهيجو اكتر
وعشان كده احترمت نفسى وبطلت اقولهم هش
هههههههههههههه
المهم صاحبى كان قرب منى شويه ولما شاف المنظر قام معمر طلقه وضرب منهم كلب فى بطنه
الكلب اخد الطلقه واتسعر اكتر ومش عاوز يبعد
وسمعنا صوت هوهوه جاى من بعييييييد اوى
بصينا لقينا اكتر من 20 كلب جايين طياره علينا

وباندفاع شديد اوى زى مايكونو اول مره يشوفو لحمه
انا شفت المنظر ولسه باألف وباقول لصاحبى اجرى ياعادل على العربيه
لقيت عادل اصلا كان وصل عند العربيه جرى وسابنى الجبان
هههههههههههههههههههههه
وانا اجرى والكلاب ورايه على بعد 40 متر
وخلاص هايجبونى هايجبونى قبل مااوصل العربيه مفيش مفر
وهوباااااااااا
قفزت فى بالى فكره جهنميه
وهوبااااااااااااااااا
طرتش بقلل يامعلم
نطيت فى الترعه اللى على شمالى بدون تفكير

بالبندقيه وبهدومى وبالجزمه كله اخر مسخره
ومحدش بقى يجى يقوللى برستيج والجزمه هاتتبل ومش عارف ايه
والنبى كل واحد يخليه فى حاله بقى ماشى
كفايه الموقف اللى انا فيه
ههههههههههههههههه
وفضلت واقف فى وسط الترعه ومش عارف اعمل ايه
والكلاب واقفالى على الشط والشر باين فى عنيهم
وبصيت على صاحبى الندل لقيته فطسان على نفسه من الضحك عند العربيه
هههههههههههههههههه
وفضلت على الحال ده اكتر من ربع ساعه فى الميه
وفى الاخر عادل الندل ركب العربيه ولف من بعيد من البر التانى وجالى وطلعنى من الناحيه التانيه
ورجعنا طياره على اسكندريه وباقى اليوم باظ طبعا ومكملناش صيد
وطبعا اتفضحت لما روحت البيت وحكيت اللى حصل
ومحدش بقى يقوللى ياباشا لو كنت ضربت منهم كلب بطلقه فى دماغه كان الباقى خاف وهرب
اولا احنا عملنا كده
ومنفعش
ثانيا بقولك حوالى 20 كلب وجايين مندفعين
يعنى على ماتضرب واحد يكون الله يرحمك
وكمان دى شكلها كلاب مش عاديه يابا
ال يخافو ال
على الله حد فيكو يضحك بقى
هههههههههههههههههههههه

mostafa.shokr ,ahmoudy ,Yousef A. Raafat و 3 آخرون معجبون بهذا

محمود بورسعيد ,عادل عبده ,كريــــم الكرانـــي

[Amin Hegazy]

هههههههههه دائما طلعاتك يا باشا فيها مواقف جامده وبعدين مبتحبش تسيب الصيد بتاعك ابدا ههههههههه كنت سبت اليمامه من الاول ليهم وكملت خط الشجر بالعربية بدل ما كملته عوم

ahmoudy ,عادل عبده ,كريــــم الكرانـــي معجبون بهذا

[القبطان المصرى77]

المشاركة الأصلية كتبت بواسطة amin hegazy

هههههههههه دائما طلعاتك يا باشا فيها مواقف جامده وبعدين مبتحبش تسيب الصيد بتاعك ابدا ههههههههه كنت سبت اليمامه من الاول ليهم وكملت خط الشجر بالعربية بدل ما كملته عوم

هههههههههههههههههه
ودايما انت اول من بيرد على مواضيعى ياامين باشا
وده شرف كبييييييييير اوى ليا
وبعدين الموقف ده كان حصل معايا من كام شهر كده مش اليومين دول
بس لقيت الجو ملل والناس حرانه قلت اخفف عنهم شويه بابتسامه جميله

[كريم الكراني]

هههههههههههههههههه .. حمدا لله علي سلامتك أولا و تعيش وتاخد غيرها .. و يا بختك يا عم طلعت بري و بحري في وقت واحد ههههههههههه

يلا مش مشكلة الجو حر .. بس أبقي خد بالك من موضوع البلهارسيا لا قدر الله .. تحياتي.

[القبطان المصرى77]

المشاركة الأصلية كتبت بواسطة كريــــم الكرانـــي

هههههههههههههههههه .. حمدا لله علي سلامتك أولا و تعيش وتاخد غيرها .. و يا بختك يا عم طلعت بري و بحري في وقت واحد ههههههههههه

يلا مش مشكلة الجو حر .. بس أبقي خد بالك من موضوع البلهارسيا لا قدر الله .. تحياتي.

هههههههههههههههههه
الله يسلمك استاذ كريم
وعلى ما اعتقد ان البلهارسيا ماتوصلش هناك كده
هههههههههههههههههههه
وعلى فكره كل الصيادين بيحصل معاهم مواقف جامده احسن من دى
ولو كل واحد فينا بيحكى اللى بيحصل معاه من مواقف
مش هانبطل ضحك هنا

كريــــم الكرانـــي معجب بهذا

[صياد المنيل2011]

الحمد لله على سلمتك ابقى المره الجايه خد معاك رشاش متعدد

[رامز ياسر]

ههههههههههههههههههههه الله ينور يا معلم اعلى شغل وبينى وبينك المغامرة مطلوبة تحس انك بتعمل حاجة بس ناااقص حاجة مهمة جدا فين ياباشا صورتك فى الترعة كانت هتبقى جااامدة ....حمدالله على السلامة

[محمود البورسعيدى]

المشاركة الأصلية كتبت بواسطة صياد المنيل2011

الحمد لله على سلمتك ابقى المره الجايه خد معاك رشاش متعدد

هههههههههههههه
انا شايف ان موضوع الرشاش دا صعب شوية انا من رأيى تآخد معاك عوامة المرة الجاية ههههههه
وبعدين الكلب اللى اخد الطلقة دا كلب فاجر صحيح دا انا بديلهم الطلقة من على بعد 20 و 30 متر بياخدوا ديلهم فى سنانهم ويفللؤا
حمدا لله على السلامة

[القبطان المصرى77]

المشاركة الأصلية كتبت بواسطة صياد المنيل2011

الحمد لله على سلمتك ابقى المره الجايه خد معاك رشاش متعدد

الله يسلمك ياصياد
على ما اعتقد ان هو ده اللى ممكن ينفع

[القبطان المصرى77]

المشاركة الأصلية كتبت بواسطة رامز ياسر

ههههههههههههههههههههه الله ينور يا معلم اعلى شغل وبينى وبينك المغامرة مطلوبة تحس انك بتعمل حاجة بس ناااقص حاجة مهمة جدا فين ياباشا صورتك فى الترعة كانت هتبقى جااامدة ....حمدالله على السلامة

ههههههههههههههه
المره الجايه بقى
وخلى بالك انا من النوع اللى بيحب يصور كل حاجه بعد الرحله
لكن طبعا يومها كانت الظروف مش سامحه ولا النفسيه
هههههههههههههه